CEBU, Philippines - Ang Philippine Health Insurance Corporation (PhilHealth) mohimo og National PhilHealth Registration Day karong Sabado ubos sa tema nga PhilHealth Sabado, Magseguro, Magrehistro.
Matud pa ni Jenet Ann Advincula, ang hepe sa field operations division sa PhilHealth-7 nga magsugod ang rehistrasyon alas 8 sa buntag hangtod alas 5 sa hapon sa University of the Philippines Cebu College, Lahug, ning siyudad.
Si Advincula miingon nga may susama gihapong kalihukan ipahigayon sa Bohol Cultural Center sa Tagbilaran city sa Bohol, Pardices Coliseum sa Dumaguete city, Negros Oriental ug sa Siquijor State Colleges sa Larena, Siquijor.
Iyang gitataw nga giawhag ang tanang mga wala pa makaparehistro sa PhilHealth ug sa mga sakop nga naputol ang ilang contributions, ilabi na sa mga indigents sa pag-adto ug magdala sa ilang initial premium ug pagbayad og P300 aron maparehistro.
Kini aron makabenepisyo sa gitanyag karon sa administrasyon ni Pres. Benigno Simeon Aquino III nga manghatag og medical assistance sa tanan, ilabi na sa mga kabus aron makagamit niini sa mga PhilHealth-accredited hospital.
Gitataw usab niini nga modawat usab sila og mga sakop nga sponsoran gikan sa Priority Development Assistance Fund (PDAF) sa mga kongresista.
Samtang si Department of Health-7 regional director Susana Madarieta mitumbok nga sa ilang nakuhang rekord sa Department of Social Welfare and Development-7, adunay 4.2 milyones ka mga indigent sa tibuok nasud, kapin sa 21 mil sa Central Visayas nga wala pa makaparehistro.
Si Advincula mitumbok nga adunay 9,109 ka mga claims sa PhilHealth tungod sa dengue nga mas taas karong tuiga kay sa miaging tuig nga 7 mil lang ka claims.
Dugang pa ni Advincula nga ang maigo sa HIV/ AIDS virus makadawat og P30 mil package gikan sa PhilHealth. – BANAT NEWS