Hustong pagbalita sa HIV gitudlo

CEBU, Philippines - Enhancing Knowledge and Skills in HIV Related Media Reporting nahimong mabungahon nga seminar-workshop nga gipasiugdahan sa Action for Health Initiatives (ACHIEVE) Inc. uban sa suporta sa Levi Strauss Foundation, kung diin gituki ang hustong pamaagi sa paghatag og balita sa masa nga adunay kahilambigitan sa Human Immunodeficiency Virus (HIV).

Nasentro ang diskusyon sa paghatag og hustong pamaagi sa pakighinabi sa mga positibo sa HIV nga dili makapinig, pamaagi sa pag-pagawas og balita nga dili makaguba sa ilang imahe ug ang pinaka-ulahi mao ang pagpangayo og suporta sa sakop sa media kabahin sa ilang organisasyon nga Cebu Plus, diin nanginahanglan sila og dakong pundo alang sa pang-adlaw-adlaw nga tambal.

Nahisgutan usab ang mga pamaagi kung unsaon paglikay sa maong sakit, ug unsay angay ug dili angay nga buhaton. Na-apil pud pagtuki ang mga paagi kung unsay hinungdan nga maka-angkon sa maong sakit. Giklaro usab nila sa katapusang bahin sa seminar nga walay angay kahadlokan ang mga tawo sa mga tsismis nga sila makakuha sa maong sakit pinaagi sa injection tungod kay kini makuha lamang pinaagi sa pag-gamit og dagum nga gigamit sa usa ka positibo ug kun ang dagum ma-inject agi sa ugat.

Gitataw ni Dr. Chona Loma sa Cebu City Health Department nga 13 ka mga bag-ong kaso sa HIV ang nadiskobrehan sukad niadtong Hulyo hangtod sa miaging semana, nga miresulta sa 163 ka mga kaso sukad niadtong Enero ning tuiga dinhi lamang sa Dakbayan sa Sugbo. Basi sa record nga misaka og dako ang numero sa mga positibo niining tuiga ug kasagaran niini ang mga OFWs ug Call Center Agents.

Matod pa ni Joel de Mesa kinsa nagdumala sa maong seminar, ang maong seminar gipatigayon arun malamdagan ang tanang sakop sa media sa kamatuoran mahitungod sa HIV ug arun usab makakat-on ang tanang reporter kung unsa ang saktong paagi sa pagpagawas og balita nga dili makahatag ug dautang imahe ug di makaguba sa kinabuhi sa tanang positibo niining sakita.  – BANAT NEWS