Biyudo giluba, gigulgol

CEBU, Philippines - Patay nang napalgan sulod sa panimalay niini ang usa ka biyudo nga naputos sa samad dinunggaban ang kalawasan ug gigulgol pa ang liog sa sitio Lapid, barangay Poblacion, lungsod sa Pinamungajan niadtong Domingo sa alas 7:30 sa buntag.

Ang biktima mao si Dominador Alicaba Villacencio, 55, biyudo ug molupyo sa nahisgutang lugar. Samtang ang suspek mao si Marlon Baldelubar, 32, molupyo gihapon sa maong dapit.

Matud ni PO1 Roilan Velasquez sa Pinamungajan Police Station sa dihang nahinabi sa Banat News nga ang anak sa biktima mao nay nakadiskobre kang Villacencio nga patay nang nagbuy-od sulod sa ilang balay nga dunay samad dinunggaban ug gigulgol ang liog.

Atol sa pakisusi sa kapolisan, nasuta nga sa wala pa ang hitabo, nag-inom pa nianang pagkagabii ang biktima uban sa mga barkada niini uban ang suspek tungod sa bunyag sa apo ni Villacencio. Apan nagdaladala na’g hait nga hinagiban ang suspek samtang nag-inom.

Daling nakasibat ang suspek ug ang kapolisan padayon pa sa paggukod aron pagsikop ug mapasakaan og kaso.  - BANAT NEWS