Gibuwagan sa uyab naghikog

CEBU, Philippines - Usa ka 49-anyos nga lalaki ang giingong naghikog human giingong gibuwagan sa iyang dugay na nga uyab diha sa sitio Mohon sa barangay Colonia sa lungsod sa Tuburan niadtong Lunes sa hapon.

Ang naghikog giilang si Pablito Bihogan, residente sa maong dapit kinsa giingong bag-ohay lang gibuwagan sa uyab ug adunay giantos nga balatian ug bag-ohay pang naoperahan.

Si PO3 Jeremias Awit sa Tuburan police station sa pakighinabi sa Banat News mibutyag nga sayo pa niana mihangyo ang namatay ngadto sa iyang 74-anyos nga inahan nga si Cipriana nga ipatawag ang iyang iyaan kay siya magpahilot sa kasakit sa iyang dughan.

Apan dangtan pila ka gutlo nakit-an nalang sa amahan niini nga si Eulogio,73, nga migawas kini diha duol sa ilang atabay ug nadungog nalang ang usa ka sipang buto sa armas.

Si Bihogan dihang gisusi nakaangkon og samad pinusilan diha sa walang bahin sa iyang dughan nga nakaingon sa hinanali niining kamatayon, narekober sa kapolisan ang usa ka kalibre 357 rebolber diha sa crime scene.

Sumala pa nga dugay nang naproblema si Bihogan gumikan sa iyang sakit ug operasyon ug nadungagan tungod sa panagbuwag niini sa iyang uyab. - BANAT NEWS