CEBU, Philippines - Pasakaan og kaso kadtong laing bata-bata sa kontrobersyal nga sinagop ni Mayor Socrates Fernandez sa Talisay City nga si Joavan Fernandez nga nanguwilyo ug nanuok og polis sa gawas nga bahin sa Vista Grande Subdivision sa Bulacao, Talisay niadtong Sabado sa gabii.
Matud sa hepe sa Talisay nga si Supt. Henry Biñas nga kasong disobedience to a police officer ang ipasaka nila sa Talisay Prosecutor’s Office batok ni McMewell Sabijon, 27, taga Lawaan I, Talisay.
Si Sabijon maoy mikuwilyo ug mituok kang PO1 Rosauro Pasumala sa dihang nasuko kini kay gipara sakay sa iyang motorsiklo nga walay plate number, samtang wala usab siyay lisensya ug rehistro sa motorsiklo.
Maayo nalang gani kay daling nakaresponde ang duha ka kaubang polis ug gidakop ug gibalhog sa karsel si Sabijon.
Matud ni Supt. Biñas nga dili mapasaka ang kasong direct assault tungod sa kahuyang sa mga ebidensya niini.
Hinuon, masaligon si Biñas nga sa ngadto-ngadto makahipos ra sila og mga lig-ong ebidensiya batok sa grupo ni Joavan nga gihulagway nga notadong grupo sa maong siyudad. (BANATNEWS)