Quirante Construction milimpyo sa pangalan

CEBU, Philippines - Usa ka negosyanteng nanag-iya og usa ka construction firm nga nagbase sa Inayagan, Naga ang miklarong dili sila maoy gipasabot sa migawas nga balita mahitungod sa kontrobersyal nga transaksyon sa kabarangayan sa dakbayan sa Sugbu.

Si Jonathan Quirante, tag-iya sa Quirante Construction miklarong dili sila ang gipasabot ni kanhi Cebu City mayor ug karon Kongresista Tomas Osmeña sa estorya kabahin sa nakontrobersyal karong E.M. Arante Construction.

Sa migawas hinuong report nga diin nasaypan ang iyang kompanya, wala kini maghisgut sa tibuok pangalan sa ilang establisamento bugtong “Quirante” lang ang nahisgutan.

Si Quirante nagkanayon nga wala sila malambigit sa mga gikwestyon karong barangay projects sa dakbayan sa Sugbu ug miawhag sa iyang mga kliyente nga wala silay angayang ikabalaka kabahin niini.

Sa pagkakaron ang ilang kompanya adunay mga proyekto nga nalambigit sa public works ug uban pa apan wala niini maapil ang kabarangayan.

Samtang gipasalig niyang dili sub-standard ang ilang trabaho ug giingong ‘dinayeg’ pa kini sa ilang mga kliyente. (BANATNEWS)