Sa 2 ka MCC 1 ray ilhon - Cortes

CEBU, Philippines - Nagkalawom pa ang kasungian sa duha ka Mandaue City College (MCC) bisan sa pag-interbener ni Ombudsman Mercidetas Gutierrez sa maong kaso. Si Gutierrez miawhag sa mga nagdumala sa maong tulunghaan ug sa mga opisyal sa kagamhanan sa maong dakbayan sa pagsulbad sa maong isyu sulod lamang sa usa ka bulan.

Sa press conference kagahapon gipadayag ni Mayor Jonas Cortes nga nagpabilin ang iyang baroganan nga dili angayang ilhon ang MCC nga gidumala ni Dr. Paulus Marie Canete.

Matud niya nga bugtong niyang giila nga legal nga MCC mao ang gidumala ni Dr. Susana Cabahug nga anaa sa Mandaue City Sports and Cultural Complex sa sitio Tribunal sa barangay Centro sa maong dakbayan .

Gipasabot ni Cortes nga maisip nga usa ka talagsaon nga mahitabo kun maoy ilhon ang MCC nga gidumala ni Canete kay gihimo na lamang siyang sakop sa board of trustee niini.

Gitataw niya nga gipalig-on ang MCC nga gidumala ni Cabahug human ang Commission on Higher Education (CHED) moluwat og kamandoan niadtong Septiyembre 14 nga nagtugot na sa maong tulunghaan sa pagtanyag sa kurso nga Bachelor of Secondary Education Program, Bachelor of Elementary Education Program ug Bachelor of Science in Information and Technology.

Ang maong mga kurso sugdan na sa pagpatuman karong ikaduhang semester niining tuiga.

Si Dr. Canete nga nahinabi sa Banat News mipasabot nga gipasubay sa gilatid nga charter ug ordinansa ang pagpadagan sa MCC nga iyang gidumala.

Gitataw niya nga walay nausab sa ordinansa nga ilang gibasehan nga maoy hinungdan busa lig-on ang ilang baroganan nga legal ang MCC nga iyang gidumala. Busa kaakohan sa kagamhanan sa maong dakbayan ang paghatag og tinuig nga budget alang sa pagpadagan niini. (BANATNEWS)