CEBU, Philippines - Mahinamon kaayong nagpaabot ang mga ginikanan sa barangay Labogon, dakbayan sa Mandaue sa gisaad sa igsoon ni Presidente Benigno Aquino III nga tukoran sila og bag-ong edipisyo alang sa 1,846 ka mga estudyante sa elementarya ug high school sa ilang lugar.
Matud pa ni Barangay Kapitan Damaso Tumulak sa Labogon nga sa dili madugay itarok na ang maong edipisyo human ipahigayon ang usa ka site inspection ni Pinky Aquino Abellada, ang pangulo sa Aklat Gabay at Pag-alaga (AGAP) Foundation dili pa dugay.
Miingon si Tumulak nga gikalipay kaayo sa tanang mga ginikanan ang maong kaugmaran kay matag tuig nagsaka ang gidaghanon sa mga estudyante nga nagtungha sa elementarya ug high school sa ilang barangay.
Gani sa pagkakaron, nag-antos lang ang ubang estudyante nga anha magklase sa mga payag-payag.
Kini mao nalay nakab-ot nga desisyon sa mga sakop kapunongan sa Parents Teachers Community Association (PTCA) kinsa nag-amot-amot og salapi nga ilang gitukod og payag-payag isip temporaryong lawak saringan sa mga estudyante. Matud pa ni Tumulak nga dako kaayo sila og pagsalig kang Abellada ilabi na nga usa kini sa mga igsoon ni Presidente Aquino.
Sa iyang pagbisita sa miaging semana misaad kini nga ang edipisyo sa eskuylahang tukoron sa Labogon, mokantidad og P700,000 nga tambayayongan paggasto uban sa pribadong sector.
Ang Labogon, sa dakbayan sa Mandaue, kauban sa mga dakbayan sa Danao, Toledo, Sugbo ug Quezon nga unang benepisyaryo sa mga proyekto sa eskuylahang sugdan na sa pagpatukod sa kasamtangang administrasyon. (BANATNEWS)