9-anyos nalubyok ang ulo

CEBU, Philippines - Usa ka 9-anyos nga batang lalaki napalgang patay kansang agtang nalubyok nga gituohang gibunalan og gahing butang sulod sa usa ka wala pa mahumang edipisyo didto sa sitio Caimitohan, sa barangay Basak, dakbayan sa Lapulapu sa miaging adlaw.

Si SPO2 Ernesto Francisco sa homicide section sa kapolisan sa maong dakbayan miila sa biktima nga si Mark Daan Bergavera, taga Basak nga nagtungha sa Grade 1.

Matud pa ni SPO2 Francisco nga sayo pa sa buntag nga mibiya sa ilang balay ang biktima, apan hangtod sa pagkahapon wala na gyud kini mouli.

Maoy hinungdan nga gipangita kini sa iyang inahan ug   mikurog sa kakurat ang naulahi dihang maoy nakita niya sulod sa wala pa mahumang edipisyo sa balay nga nagbuy-od ang biktima nga wala nay kiunabuhi.

Dugang pa ni SPO2 Francisco nga dihang ilang gisusi, nabulit sa mga samad ang lawas sa biktima gawas sa agtang niining nalubyok nga gituohang gipusposan og gahing butang nga maoy nakaingon sa iyang kamatayon.

Si SPO2 Francisco miingon nga sa sayo pa nagtuo sila nga misaka ang biktima sa ibabaw nga bahin sa gitukod nga balay ug nahulog.

Apan wala usab nila ihiklin ang katahap nga kini gituyo sa pagpatay pinaagi sa bunal nga usa sa gitutokan sa ilang imbistigasyon karon.

Si SPO1 Francisco miingon nga masuta unya kun adunay foul play ang kamatayon sa biktima sa higayong ma-autopsy na ang patay’ng lawas niini. (BANATNEWS)