CEBU, Philippines - Tulo ka mga rent-a-car operator sa dakbayan sa Lapulapu mipasaka og kaso ngadto sa Ombudsman batok kang Regional Direcrtor Benjamin Go sa Land Transportation Franchising and Regulatory Board (LTFRB)-7 gumikan sa pagpanghulga.
Ang mikiha og Serious Misconduct batok kang Go mao sila si Samuel Lim, Pablo Perez ug Cosme Sameon pulos mga opisyal sa Cebu Association of Rent-A-Car Companies (CARCOM ) nga nag-base sa siyudad sa Lapulapu. Matud pa nila ni Lim, Perez ug Cosme sa ilang hiniusang affidavit nga niadtong Agosto 25, 2010 miadto sila sa buhatan ni Go aron makigdayalogo tungod sa reklamo sa ilang miyembrong operator nga si Loy Cortes kansang application paper gihapak sa iyang nawong ug ni Bong Acelo nga gikasab-an pag-ayo.
Ang presidente sa CARCOM nga si Lim maoy nag-unang misulod sa buhatan ni Go niadtong higayona ug mitunol sa iyang kamot aron unta sa paglamano ni Go, apan wala kini dawata sa naulahi ug gimandoan hinuon siya sa pagpalingkod.
Dihang gisugdan nila ang paghisgot sa ilang reklamo labot sa pagdumili sa pagdawat sa aplikasyon sa ilang mga karaang miyembro samtang ang bag-o ug dagkong operator nga mao ang Avis ug Europ maoy gidawat, sila si Lim, Perez ug Cosme miingon mihiwasa si Go sa kasuko ug nga gipangligid sila og kasaba niini.
Unya wala pa magtagbaw sa pagpangasaba, giakusahan pa sila ni Go nga matud pa misagop sila sa “kabit system” kay ang ilang mga frankisa "null and void" kuno.
Nagduda sila nga si Go mihatag og pabor ngadto sa dagkong operator nga ilang kakompetensiya nga mao ang Avis ug Europ.
Sigun pa sa tulo ka mga kihante nga ang labing nakapakurat nila mao ang paghulga ni Go nga gukdon sa iyang buhatan ang ilang asosasyon sa mga rent-a-car companies ug lakip na ang tagsatagsa ka mga operator niini. Tungod sa alegasyon nga nakigkonsabo kuno sila sa usa sa mga empleyado sa LFTRB-7, gipatawag ni Go ang iyang empleyado nga si Ma. Theresa Acelo ug gikasab-an kini atubangan nila sa lanog ug sipa kaayong tingog.
Ang mga pamahayag ug pagpabor ni Go sa Avis ug Europ maoy gibasehan nila ni Lim, Perez ug Cosme sa pagpasaka sa kasong kalapasan sa Section (e) sa Republic Act No. 3019 kon ”corrupt practices of public officers causing any undue injury to any party”, ug kalapasan sa Republic Act 6713 kon “grave abuse of authority and serious misconduct”. (BANATNEWS)