'Pusher' sa Soong 1 sikop sa PDEA-7

CEBU, Philippines - Duha ka gidudahang tigpayuhot og ilegal nga drugas diha sa barangay Soong Uno sa dakbayan sa Lapulapu ang nasikop sa gihimong buybust operation sa Philippine Drug Enforcement Agency niadtong milabay’ng adlaw.

Si Jessie Tabanao, ang tigpamaba sa PDEA-7 miila sa mga dinakpan mao sila si James Bryle “Opaw” Alfeche, 21, residente sa maong dapit ug Bherny Gapol, 24, lumad nga taga Sapad, Lanao del Norte.

Si Tabanao sa pakighinabi sa Banat News mibutyag nga nangreklamo na ang mga residente sa maong dapit gumikan sa kanunay’ng pagkabara sa trapiko sa ilang dalan tungod sa mga mag-parking nga manuyopay nga anha magpalitan kang Alfeche ug Gapol. Sumala pa ni Tabanao nga dili momenus tulo ka mga residente ang misumbong kanila kabahin sa maong problema hinungdan nga gisusi kini sa PDEA ug human makumpirmar sulod sa duha ka semanang pagpaniid gihimo ang buybust niadtong milabay’ng hapon.

Matud pang Tabanao si Gapol maoy nakig-atubang sa ilang ahente nga mipalit og usa ka paketeng shabu nga mobalor og P200 apan si Alfeche maoy mitunol niini ug midawat sa kwarta human apasa ni Gapol sa ilang payag.

Si Alfeche nakamatikod nga awtoridad ang iyang gibaligyaan daling midagan sa payag apan naalirungan dayon ang ilang tagoanan hinungdan nga silang duha nadakpan.

Nakuha kang Alfeche ang buybust money, onse ka paketeng pulos may sulod nga gidudahang shabu ug si Gapol nakuhaan usab og 29 ka paketeng may sulod gihapong gidudahang shabu.

Matud pang Tabanao adunay nagsuplay sa duha nga taga Mindanao nga maghatud niini matag kaadlawon ug karon ilaha nang gisubay. (BANATNEWS)