1 Patay, 1 angol sa toledo, Alegria

CEBU, Philippines - Usa ka lalaki ang namatay samtang laing usa ang naangol sa duha ka managlahing insidente sa pagpamusil sa lungsod sa Alegria ug sa dakbayan sa Toledo niadtong Sabado sa gabii.

Ang nakalas giila ni PO1 Efren Salvador mao si Crisanto Gedorio, 35, usa ka mag-uuma nga nagpuyo diha sa gihitaboan sa sitio Lamacan barangay Valencia sa Alegria.

Sumala pa ni Salvador sa Banat News base sa imbestigasyon natulog ang biktima ibabaw sa kawayan nga lantay daplin sa barangay road human makig-inom sa mga higala duol sa balay sa usa ka Nestor Libron.

Apan samtang natulog, usa ka wala mailhing tawo ang giingong kalit nga miduol sa biktima ug gipusil ang luyong bahin sa ulo niini hinungdan sa hinanali niining kamatayon.

Dugang pa ni Salvador nga base sa ilang pagsukit-sukit sa dapit walay nakahinumdom nga nakakita og away o lalis ang biktima sa ilang lugar, nagduda si Salvador nga posibleng paregla lang ang nahitabo.

Sa laing bahin, usa ka Armand Francisco Patiño, 21, nga taga barangay Looc 2 sa dakbayan sa Toledo ang naangol human kini gipusil sa usa ka Reggie Dungon Duvibar,19, samtang ang nahauna padulong mouli. Sumala pa ni SPO4 Gil Lastimosa sa Toledo Police Station sa pakighinabi sa Banat News nga luwan sa usa ka bisekleta ang biktima niadtong tungura gikan mitambong og disko sa barangay Awihao.

Apan pag-abot sa barangay Cabituonan kalit nga mibutho ang suspek uban sa gitumbok nga kakunsabong si Tonton Pahaganas ug gipusil si Patiño sa tuong bahin sa luyo sa ulo.

Ang mga suspetsado daling miikyas palayo sa maong lugar samtang daling gidala sa Toledo District Hospital si Patiño apan gibalhin sa usa ka tambalanan sa dakbayan sa Sugbu.

Sa gihimong hot pursuit operation sa kapolisan nadakpan nila ni PO3 Eliseo Tajanlangit si Duvibar. Gikatakdang pasakaan og kaso ang duha karong adlawa. (BANATNEWS)