Gidudahang kawatan mikatkat sa Globe tower

CEBU, Philippines –  Usa ka gidudahang kawatan kinsa misaka kagahapon sa kaadlawon sa kinatumyan sa tower sa Globe Telecommunication sa barangay Lawaan II, dakbayan sa Talisay nasakmitan og usa ka kutsilyo ug ice-peak sa kapolisan.

Ang suspetsado mao si Jhonny Burno, ulitawo, taga barangay Cabancalan, dakbayan sa Mandaue kinsa gipasakaan og kasong alarm and scandal ug illegal possession of deadly weapon, nga labing nakalapas sa balaod sa Comelec nga mipaipekto sa   gun ban   sugod kagahapon.

Nasakmit sa mga polis gikan ni Burno ang pito ka pulgadang gitas-on nga ice peak ug kitchen knife nga dunay gitas-ong siyam ka pulgada.

Si Inspector Hugo Rio Ipong sa Talisay City Police Station nga nahinabi sa Banat News mibutyag nga si Burno nasakpan sa gwardiya sa tower dihang mikatkat kini sa pader.

Matud ni Ipong nga posible nga sa kahadlok ni Burno milahos na lang kini og katkat ngadto sa kinatumyan sa tower.

Usa ka molupyo sa maong   lugar nga si Gani Cañete maoy mitawag sa kapolisan sa TCPS ug mitaho sa maong insidente.

Ang grupo ni Ipong daling mitubag sa maong alarma ug naabtan nila si Burno diha sa ibabaw sa tower naghigda-higda, usahay molingkod ug mobarog.

Matud ni Ipong nga dili motubag si Burno kung ilang sangpiton nga pakanaugon hinungdan nga ilang gituohan nga wala kini sa iyang panghuna-huna ug nabalaka silang moambak gikan sa tower.

Si Ipong daling mitawag sa Talisay Rescue Emergency Action Team (TREAT) ug sa Provincial Bureau of Fire diin nagpadala kini sa ilang Special Rescue Unit (SRU).

Ang mga sakop sa TREAT ug SRU maoy misaka ngadto sa tower aron isalbar si Burno ug ang mga polis usab maoy diha sa ubos nga nangandam diha aron saw-on si Burno kung ugaling moambak kini, apan mikanaog ra usab ang suspetsado gikan sa tower.

May dala usab kining sako ug mitug-an siya sa mga polis nga usa siya ka basurero apan wala kini mohatag og rason sa iyang pagsaka ngadto sa tower.

Ang kapolisan natahap nga si Burno usa ka kawatan ug nakig-coordinate na sila ngadto sa Mandaue City Police Office pagsuta kung wala bay criminal record diha sa ilang buhatan si Burno.  (BANAT NEWS)