Sunog sa Mandaue 3 ka balay ugdaw

CEBU, Philippines –  Naugdaw ang tulo ka panimalay ug laing tulo usab ang igo lang nakan-an sa kayo sa sunog nga miulbo didto sa dalan H. Abellana sa barangay Basak, dakbayan sa Mandaue kagahapon sa alas 9:00 pasado   sa buntag.

Gituohang kuryente nga gikitkit sa ilaga nga maoy hinungdan sa kalit nga pag-ulbo sa kayo.

Si FO3 Ceferiano Codilla nga misusi sa maong hitabo miingon nga ang mga nangaugdaw nga balay nga gipanag-iya nila ni Antonio Lina ug Eugenio Co, pulos ginama sa mga gaan nga materyales.

Dugang pa ni FO3 Codilla nga si Lina maoy tag-iya sa usa ka panimalay nga naugdaw ug tag-iya usab kini sa lain pang duha ka panimalay nga nakasinati og kadaut.

Ang ikatulong panimalay nga naugdaw gipanag-iya usab ni Euginio Co ug ingon man lakip ang duha pa ka panimalay nga naugdaw ug ingon man ang laing usa ka panimalay nga nakasinati og kadaut.

Si FO3 Codilla miingon nga nagsugod ang kayo sa gipaabangan nga balay ni Lina nga walay tawo dihang nahitabo ang sunog tungod kay ang nagpuyo sayo nga nanglakaw kay nangaligo og dagat.

Mikabat sa P100,000 ang danyos sa maong sunog nga naglakip sa mga butang sa sulod sa panimalay .

Matud pa ni Codilla nga gitug-an ni Lina nga nakita niini ang kayo nga milatay sa kuryente sa kisame nga napanit ug gituohang gikitkit sa ilaga.

Hinuon si Codilla miingon nga atol sa maong sunog walay naangol ug walay kinabuhing nakalas.  (BANAT NEWS)