7 sikop sa pagpangronda

CEBU, Philippines - Pito ka mga lalaki ang nasikop sa kapolisan sa pagronda sa duha ka balay nga miresulta sa pagkasakmit sa ubay-ubay nga armas ug mga bala, ug  shabu sa barangay Hipodromo sa miaging hapon.

Ang team sa kapolisan nga gipangulohan ni Supt. Pablo Labra II deputy City Director for Operation inabagan sa mga sakop sa City Anti Illegal Drugs Special Operation Task Group (CIADSOGT) sa Cebu City Police Office kinsa may dalang Search Warrant (SW) nga giluwatan ni Executive Judge Meindrado Paredes sa Regional Trial Court (RTC) branch 13.

Ang nasikop mao sila si Bonifacio Nalez Sanchez alias Bone ug Archie Russel alias Maloy pulos hingkod, nga pulos taga Hipodromo, kinsa maoy subject sa SW.

Laing nasikop mao sila si Michael Aguipo, 33, minyo, taga Riverside, Joel Aldea, 41, ulitawo, taga San Antonio St,. Norman Laurel, 30, ulitawo taga 80-A Lapulapu St,. Rommel Medicu, 40, minyo taga St. Joseph, ug Rommel Tundag, 40, ulitawo taga sitio Riverside, pulos taga Hipodromo kinsa nasakpang nag-tong-its.

Atol sa pagsiksik sa sulod sa balay ni Sanchez nakuha sa mga otoridad ang usa ka Colt .45 caliber pistol, usa ka Safari .45 caliber pistol, duha ka magazine, pito ka buhing bala, tulo ka buhing bala sa .38 revolver, napulo ka medium plastic pack nga gituohang shabu, usa ka digital weighing scale, usa ka sniffing and repacking paraphernalia.

Samtang nakuha usab sa balay ni Russel ang 15 ka medium heat sealed transparent plastic pack nga shabu, duha ka Colt .45 caliber pistol, unom ka magazine sa caliber .45 nga dunay 89 ka buhing bala ug sniffing and repacking drug paraphernalia.

Si Sr. Supt. Melvin Ramoin Buenafe kasamtangang hepe sa CCPO mitug-an sa mga tigbalita nga ang ilang target sa SW mao sila si Russel ug Sanchez human sila nakadawat og report nga pulos armado ang duruha.

Giklaro niini nga incidental lang ang shabu nga ilang nakuha sa posisyon sa duha ka mga suspek.

Matud ni Buenafe nga ang ilang gihimo nga operasyon tipik ug kabahin sa ilang kampanya nga Oplan Kontra Boga nga gihingusgan karon gumikan sa nagsingabot nga piniliay sa Barangay ug Sangguniang Kabataan (SK) karong Oktobre 25.

Si Buenafe midugang nga base sa ilang gihimo nga pakisusi, sila si Sanchez ug Russel nasuta nga nalambigit usab sa mga tulis, pagpamaligya og ginadiling drugas, ug ingon man may grupo nga kaabag sa pagpamaligya og ginadiling drugas. – BANAT NEWS