Mipatay sa magtiayong Torreon pulos wanted sa Talisay

CEBU, Philippines - Ang mipatay sa magtiayong Torreon sa dakbayan sa Lapulapu, pulos mga most wanted sa dakbayan sa Talisay kinsa nangalyas lamang sa ilang mga ngalan.

 Atol sa imbestigasyon nga gihimo ni P/Insp. Juan Capacio ug SPO2 Rolito Jumao-as sa Crime Against Persons desk, nasuta nga si Bigboy Tabera kinsa usa sa mga suspetsadong mipusil patay ni Eduardo Torreon, Wilson Tabera Cabanes, ang tinuod niyang ngalan kinsa lumad sa Brgy. Tangke, dakbayan sa Talisay.

 Nasuta ni SPO2 Jumao-as nga si Cabanes adunay kaso sa pagpatay sa usa ka taga Tangke, sa maong dakbayan sa milabay’ng bulan.

 Si Cabanes nga nahinabi sa Banat News miangkon nga nangalyas siya kay dili siya buot nga mautingkay ang iyang mga kaso sa dakbayan sa Talisay kay gi- wanted na siya didto.

 Matud pa ni Cabanes nga nabilanggo na siya gumikan sa illegal nga drugas niadtong 2007 ug bag-o lang siyang nakagawas gikan sa Talisay City Jail niadtong Agusto ning tuiga.

Apan pipila ka adlaw human siya makagawas,   gilambigit na usab siya sa kasong pagpatay sa usa ka molupyo, hinungdan nga milayas siya ngadto sa dakbayan sa Lapulapu.

 Samtang si Allan Aca mitug-an nga aduna siyay kasong pagpanulis sa dakbayan sa Talisay diin ang biktima iya usab nga gipusil hinungdan nga siya milayas usab ngadto sa lungsod sa Cordova.

 Ang duha ka suspetsado daling miangkon sa ilang pagpusil patay ni Cresilda ug Eduardo Torreon sa Brgy. Poblacion dakbayan sa Lapulapu sa milabay’ng Miyerkules sa hapon apan hugot nga mipanghimakak nga adunay nagsugo kanila paghimo sa maong krimen.

 Samtang si Jingle Torreon ang ikaduhang anak sa magtiayong Torreon mapasalamaton sa mga sakop sa kapolisan sa dinaliang pagkasulbad sa kamatayon sa iyang mga ginikanan nga gipamusil patay sa duha ka suspetsado.

Gipanghimakak usab ni Torreon ang mga pasangil nga usa ka mamarang sa ilang dapit ang iyang inahan.   – BANAT NEWS