Right to reply bill gibasura

CEBU, Philippines - Hingpit nang gibasura sa Kongreso ang giumol nga right to reply bill sumala ni Kongresista Lorenzo Tañada III, sa ika-upat nga distrito sa Quezon Province.

Si Tañada atol sa usa ka press conference nga gipasiugdahan sa University of San Carlos Stand Alumni Foundation uban sa tema nga “The Prospect of Reforms Under the Aquino Administration: A reality?”, nagkanayon nga nalipay usab siya nga hingpit nang nahanaw ang right to reply bill.

Sa samang higayon gibutyag usab niya nga padayon pang gituki karon sa Ubos Balay Balaoranan ang bahin sa House Bill (HB)2543 ang gitawag nga freedom of information act.

Nasayran gikan kang Tañada nga may nagkalainlaing version ang maong balaodnon ug usa na niini ang iyang kaugalingong version.

Busa matud pa niya nga ilang usahon ang tanang mga version ning maong balaodnon sanglit gikinahanglan kaayo kini sa katawhan.

Kutob sa tawong molikay sa paghatag og impormasyon, kinahanglang kapahamtangan siya og silot, sumala sa maong balaodnon, matud pa ni Tañada. – BANAT NEWS