CEBU, Philippines - Mikabat sa P35,000 ang nasakiyo sa mga wala hiilhing tulisan gikan sa usa ka kolektor sa financing company didto sa sitio Maantod, barangay Dumalan, lungsod sa Dalaguete sa miaging buntag.
Ang biktima nailhan nga si Leonora Caminade Albuera, 28, kolektor sa Kauswagan Micro Finance Inc.,nga taga barangay Mandilikit, lungsod sa Argao.
Ang biktima misumbong sa kapolisan sa Dalaguete Police Station nga nagsakay siya og habal-habal nga gimaneho ni Richard Quevedo kay mangolekta siya sa bayad sa ilang mga suki didto sa sitio Kalubtingon, barangay Santicon, lungsod sa Badian ug sa barangay Manlapay, lungsod sa Dalaguete.
Sumala sa biktima nga nagpaingon na sila niadtong tungora sa Mantalongon, dihang pag-abot didto sa sitio Maantod, kalit lang gibabagan sila sa usa ka motorsiklo nga gisakyan sa duha ka wala hiilhing mga tawo nga armado.
Dihang mihunong ang motorsiklong gisakyan sa biktima, gitionan dayon siya ug ang drayber sa habalhabal sa mga armas de fuego sa duha ka mga tulisan ug mipahibawo nga tulis.
Sa kabalaka nga patyon siya, gitunol niya ngadto sa mga tulisan ang iyang bag nga may sulod nga P34,000 uban sa kaugalingon niyang kuwarta nga P900 ug cell phone.
Human makuha ang bag sa biktima misirit dayon og padagan sa ilang sakyanan ang mga tulisan. Padayon pang giimbistigar sa kapolisan ang maong hitabo. – BANAT NEWS