Pasahera gikulata gitulis sa drayber sa traysikol sa Lapu

CEBU, Philippines - Usa ka drayber og traysikol nadakpan sa kapolisan human gisumbong nga mikulata ug mitulis sa pasahero niining babaye sa miaging alas 11 sa gabii sa Hawaiian Village, barangay Marigondon, dakbayan sa Lapulapu.

Ang nadakpan mao si Jorge Nepumoceno, 32, ulitawo nga taga Basak sa maong dakbayan.

Gidakop si Nepumoceno human misumbong ang iyang biktima nga si Rhea Mea Caballero, 27, molupyo sa nahisgotang dapit.

Si PO2 Lisen Inot sa Theft and Robbery Section sa Lapulapu City Police Office miingon nga pasahero ni Nepumoceno si Caballero gikan sa Poblacion ug nagpahatod paingon sa Marigondon.

Dugang pa niya nga sa pag-abot sa awa-aw nga dapit kalit lang gipahunong ni Nepumoceno ang traysikol ug nagpakaaron-ingnon siyang nangihi.

Sa dihang nahuman na sa pagpangihi, si Nepumoceno daling milipot ug gibunlot niini si Caballero nga naglingkod sulod sa traysikol ug iyang gikulata. Gikuha niini ang cellphone, gold necklace ug bracelet sa biktima.

Matud pa ni PO2 Inot nga ilang nasigpatan ang maong insidente sa dihang nahiagi sa maong dapit nga nagpatrolya hinungdan nga ilang gisikop ug gipriso si Nepumoceno.  - Romeo T. Limpangog ug Bong Soriano (BANAT NEWS)