Val wa na's Alayon, nanumpa sa Liberal

CEBU, Philippines - Sa iyang kasagmuyo nga wala hatagi og patas nga pagtagad sa iyang mga kauban sa administrasyon, si Konsehal Val Yllanan sa dakbayan sa Talisay pormal nga miduso sa iyang resignation sa Alayon Party kagahapon sa buntag ngadto kang Kongresista Eduardo Gullas kinsa maoy lider sa partido.

Si Yllanan kagahapon sa hapon gikatakdang mohurar ngadto kang Bise Gobernador Gregorio Sanchez isip bag-ong miyembro sa Liberal Party.

Sa pakighinabi niini sa Banat News, si Yllanan nagkanayon nga ‘peace of mind’ ang iyang buot makawhat sa iyang pagtapon sa LP.

Matud niini nga sa iyang gibuhat karon andam na siya sa mga umaabot nga panghitabo ug niining higayona madawat na niya ang dili maayong pagtagad sa iyang kauban sa konseho sa Talisay tungod kay mibiya na siya sa grupo.

Kahinumduman nga si Yllanan atol sa sesyon sa konseho niadtong Martes miluwat og privilege speech sa pagpadayag sa iyang mga kasagmuyo ngadto sa iyang mga kauban sa administrasyon.

Apan matud sa konsehal nga walay gihimong aksiyon ang iyang mga kauban sa administrasyon ug nabatyagan niya nga gibalewala lang siya sa iyang kaubanan.

Kahinumduman usab nga si Bise Mayor Alan Bucao nagkanayon nga dili siya makabasol kang Yllanan tungod kay natagamtaman usab niya kaniadto ang nasinati karon sa konsehal sa dihang wala pa siya sa landong sa administrasyon.

Ang mga konsehal nga ubos sa landong sa oposisyon nga sila si Romeo Villarante ug Danny Caballero miagni kang Yllanan nga motapon ngadto sa ilang grupo.

Si Yllanan sa iyang bahin midugang nga bisan pa sa sitwasyon karon paningkamutan gihapon niya nga makahatag og kaayohan ngadto sa mga Talisaynon. – BANAT NEWS