CEBU, Philippines - Nahingangha ang mga sepulturero ug ang mismong kabanay sa usa ka namatay nga pari 15 na ka tuig ang nakalabay wala gihapon kini madugta dihang ilahang giugkat kagahapon diha sa Pardo Public Cemetery.
Sa report sa DyAB kagahapon, giugkat sa mga kabanay sa namatay nga si Msgr. Tomas Maglasang, 80, ang patay’ng lawas niini aron unta ibalhin sa bone chamber sa maong sam-ang.
Apan nakugang nalang silang tibuok pa gihapon ang lawas niini ug wala gani madugta.
Giingong mao na kini ang ikaduhang higayon nga ilahang gihabwa ang maong patay’ng lawas aron unta ibalhin sa laing butanganan apan susama sa naunang pag-ugkat tibuok pa gihapon ang lawas niini maong gibalik kini og lubong sumala pa sa sepulturerong si Saldo Baclayon.
Sumala pa nga namatay si Maglasang niadtong Disyembre 29, 1995 ug paglabay sa walo ka tuig giugkat kini apan wala madugta maong gibalik kini og lubong. Ang medico legal officer sa PNP Crime Laboratory-7 nga si Sr. Supt. Nestor Satur sa pakighinabi sa Banat News mibutyag nga kun maayo ang pagka-embalsamar sa patay’ng lawas posible kini.
Dugang pa niya nga kun hugot ang pagkasira sa lungon, maayo ang pagkahabwa sa body fluids, walay kagaw nga nakasulod sa lawas ug wala matugpahi og langaw dako kaayo ang posibilidad nga dugay o dili madugta ang usa ka patay’ng lawas. - BANAT NEWS