Bayot gisikop sa kasong rape

CEBU, Philippines - Nasikop sa kapolisan ang usa ka mahuyang nga responsable sa pagpanglugos og usa ka minor de edad nga babaye didto sa sitio Bantayan, Poblacion lungsod sa Cordova niadtong Miyerkules sa alas 3 sa hapon.

Ang suspek mao si Julmar Pacaldo, 23, molupyo sa nahisgutang lugar ug usa ka mahuyang.

Matud ni PO2 Calexto Butantan sa Cordova Police Station sa dihang nahinabi sa Banat News subay sa blotter nga gibasehan niini, si Pacaldo gisikop subay sa warrant of arrest nga giluwatan ni Regional Trial Court   Judge Victor Teves sa kasong statutory rape.

Matud ni PO2 Butantan, ang pagpanglugos nahitabo niadtong    Marso 3, niining tuiga didto sa barangay Catarman diin gipahimuslan sa maong mahuyang ang usa ka menor de edad nga dalagita.

Ang kabanay sa biktima mipasaka og kaso hinungdan nga naluwatan ang warrant of arrest ug gi-serve kini kagahapong adlawa hinungdan nga gidakop sa kapolisan ang suspek.

Ang suspek nga nagtingkagol na karon sa karsel samtang nagpaabot sa husay sa kaso niini ang hugtanon usab nga nanghinamakak sa maong panghitabo. - BANAT NEWS