Gipangdunggab tungod sa selos

CEBU, Philippines - Gidunggab ang usa ka lalaki sa igsuon sa gitaban niining babaye didto sa GY dela Cerna St. Poblacion dakbayan sa Lapu-Lapu kagahapon sa   kadlawon.

 Ang biktima mao si Vidal Arsolon Rosel, 26, ulitawo lumad sa Poblacion lungsod sa Daan Bantayan ug temporaryong nanimuyo sa sitio Humay-humay barangay Gun-ob, Lapu-Lapu.

 Base sa imbestigasyon nila ni SPO2 Ernesto Francisco ug PO3 Dioscoro Arong sa Crime Against Persons desk sa Lapu-Lapu nasuta nga nagtaban si Rosel ug ang iyang hinigugma ug gikasuko kini sa pamilya sa babaye.

 Samtang si Rosel gikan sa usa ka internet café giingong giatangan ang biktima sa igsuon sa iyang uyab uban sa laing duha ka wala mailhing mga lalaki.

 Buot nga papaulion sa suspetsado ang iyang igsuong babaye, apan nahimo kini nilang lalis ni Rosel.

 Atol sa panaglalis wala makabantay si Rosel nga usa sa kauban sa igsuon sa iyang uyab ang milipot sa iyang likod ug midunggab ngadto kaniya sa likod ug bukton.

Sa laing bahin, usa ka bana nanunggab sa iyang kauban nga drayber sa habal-habal tungod sa selos niadtong Miyerkules sa gabii diha sa H. Labra Street, barangay Guadalupe, dakbayan sa Sugbo.

Ang biktima mao si Isidro Caresosa Araco Jr., 44, minyo taga sitio Sandayong, barangay Guadalupe ning siyudad.

Ang suspetsado mao si Custodio Mariquit Jr., taga Sapangdaku sa nahisgutang barangay.

Base sa imbestigasyon sa kapolisan nga si Mariquit mipasangil ngadto sa biktima nga dunay relasyon ug ang iyang asawa.

Kalit lang miduol ngadto sa biktima ang suspetsado dihang paingon na unta kining mosakay sa iyang motorsiklo ug mibuhi og dili maayong pulong dayong panunggab.

Si Araco nakaangkon og mga samad dinunggaban sa walang bahin sa iyang tiyan, dughan ug tuong bahin sa lawas daling gidala ngadto sa Chong Hua Hospital.

Ang mga suspetsado sa pagpanunggab parehong nakaikyas ug gipangita pa sa kapolisan. - Bong Soriano ug Joanna A. Daragosa (BANAT NEWS)