PB gihagit ni Oaminal

CEBU, Philippines - Gihagit sa kanhi Undersecretary sa Dangerous Drugs Board DDB Atty. Paul Clarence Oaminal ang hunta probinsiyal sa Sugbo sa pagpalabang og balaodnon nga magdili sa pagpamaligya og nubain sa mga botika ug mga pharmacy dinhi sa lalawigan.

Gihimong sanglitanan ni Oaminal ang konseho sa dakbayan sa Sugbo nga mipalabang na og ordinansa nga nagdili sa pagpamaligya sa nubain dinhi sa dakbayan human hisayri nga mao kini ang gikabuangan karon sa mga batan-ong adis-adis.

Lakip sa gi-awhag ni Oaminal ang tanang local nga opisyal sa kagamhanan sa tibuok nasud karong nubain na maoy gihimong drugas nga gigamit sa mga drug addict.

Si Oaminal mipalanog sa maong awhag human hisayri nga hangtud karon pabiling pakyas ang DDB sa pagklasipikar sa nubain isip gidiling drugas luyo sa kamatuoran nga gigamit na kini sa mga adis-adis.

Dugang ni Oaminal nga niadto pang tuig 2006 gisugyot na niya ang pagklasipikar sa nubain isip ginadiling matang sa druga gumikan sa pagkabaniog na niini nga kanunay’ng gigamit sa mga nagbisyo sa ginadiling drugas, apan wala gayu’y action ang kagamhanan.

Si Oaminal gipalagpot ni kanhi Presidente Gloria Arroyo sa pagka DDB Undersecretary niadtong milabay’ng Marso human madiskubrehi ang gipalusot mga cocaine nganhi sa nasud.

Matud pa niya nga nasuta na nga ang mga tawong migamit og nubain isip alternatibo sa shabu nangayabag ang utok ug nakapasayon kanila sa paghimo og krimen. – BANAT NEWS