Pagduwa'g kaka ipasanta

CEBU, Philippines - Gihagit ni Konsehal Edgardo Labella ang mga opisyales sa barangay ug ang mga kadagkoan sa mga tulunghaan sa pagsanta sa mga kabataan gikan sa pagpanakop og kaka kay makatabang kini sa pagpatay sa lamok nga dengue.

Matud pa ni Labella nga dili angay himoong duwaan ang mga kaka ug labaw sa tanan dili angayang ilakip sa sugal ang maong butang nga may kinabuhi tungod kay kaabag kini sa pagluwas sa kinabui.

Alang kang Labella, matag lamok sa dengue nga kaunon sa kaka, nakasalbar kini og kinabuhi, tungod kay matag lamok sa dengue nga makapaak og bata o kaha dakong tawo usahay walay kasigurohan kun masalbar ba ang biktima.

 Matud pa sa konsehal nga naghitak na karon ang mga mamaligyaay og kaka sa gawas sa mga tulunghaan, ingon man usab sa mga merkado kay gihimo na kining sugalan sa mga sugarol.

Giingong sayon na lang kaayo ang pagpalit sa mga kaka kay mapalit ra kini sa mga kadalanan busa giawhag usab sa konsehal ang mga kadagkoan sa Department of Education nga istriktuhon ang kamandoan sa pagdili sa pagpamaligya og kaka gawas sa mga tulunghaan.

Midugang si Labella nga peligro usab ang pagdula og kaka kay may pipila niining mamaak ug maghatag og kadelikado sa mapaakan.

 Samtang gipadayag   ni Mayor Michael Rama nga padayon karon ang kampanya batok sa dengue pinaagi sa programa sa dakbayan nga gitawag nga Dengue Education Awareness and Reduction (DEAR). Sa labing ulahing talaan, mikabat sa 1,803 ang mga kaso sa dengue sa dakbayan sa Sugbo karong tuiga.

 Nakigtambayayong usab ang siyudad sa mga opisyales sa barangay aron hingpit nga ma-monitor ang sakit nga dengue nga gikabalak-an pag-ayo sa katawhan. – BANAT NEWS