UV Accountancy moapil sa 12th FINEX-CITI competition
CEBU, Philippines - Ang University of the Visayas apil sa lima ka tunghaan sa Cebu nga mosangka sa final round sa 12th FINEX-CITI Inter-Collegiate Finance Competition.
Si Rosemarie Español, dean sa UV College of Business Administration, nagkanayon nga ang unibersidad mihuman sa top 5 sa regional competition niadtong Septiyembre 17 sa University of San Carlos ug mipatong sa national top 20 human midaog sa panagtabla tali sa University of Makati.
Ang UV girepresentahan sa mga 4th year students sa B.S. Accountancy nga sila si Roy Anthony Genilla, Mabelle Arellano ug Joanne Buling-buling. Ang mga coach, gawas kang Español, mao sila si Bengie Bayer, Sarah Benitez ug Beethoven Encabo.
Ang FINEX ICFC unang gihimo niadtong 1999 sa tuyo nga mapatas-an ang kalidad sa finance education sa nasud ug aron ma-expose ang miapil nga mga tunghaan ngadto sa world-class finance education standards.
Mokabat sa 72 ka tunghaan lukop nasud ang miapil sa ika-12 nga FINEX ICFC elimination rounds, nga dungang gihimo sa lima ka lugar – Asian Institute of Management alang sa NCR Central ug Central ug Southern Luzon; University of Baguio sa Northern Luzon; Xavier University sa Mindanao; University of St. La Salle sa Western Visayas ug University of San Carlos alang sa Eastern ug Central Visayas.
Si Español nagkanayon nga ang UV miapil sa kompetisyon niadtong 2006 ug na-qualify alang sa final round niadtong 2007. Ikaduhang higayon karon nga na-qualify ang UV sa final round.
Gawas sa top 20 schools, mga tunghaan gikan sa Asian region sama sa Hong Kong, Singapore, Malaysia ug Thailand mopartisipar sa final round nga himuon karong Oktubre 18, 2010 sa Bangko Sentral ng Pilipinas main office sa Manila.
Si Dean Español nagkanayon nga ang suporta nga gibubo sa unibersidad, pinanguluhan sa presidente, Kongresista Eduardo R. Gullas ug Executive Vice President Jose “Dodong” R. Gullas, lakip na sa mga training nga gihatag sa mga coach, ang giisip nga rason nga ang mga estudyante mipakita sa ilang kinamaayohang kapabilidad atol sa kompetisyon.
Duha sa mga estudyanteng mirepresentar sa kompetisyon – Genilla ug Arellano – mga miyembro usab sa team nga midaog sa championship sa Level 2 Accountancy Quiz Bowl niadtong Hulyo 21. - BANAT NEWS
- Latest
- Trending
