CEBU, Philippines - Gipadala na kagahapon ni Mayor Michael Rama ngadto sa buhatan ni Kalihim Jessie Robredo sa Department of Interior and Local Government (DILG) ang iyang rekomendasyon alang sa itudlo niya nga bag-ong chief fire marshall sa Cebu City Fire Department.
Nakahukom na ang mayor nga ang kasamtangang hepe sa fire department sa National Capital Region nga si Aderson Comar maoy itudlo niya nga hepe sa fire department sa dakbayan sa Sugbo.
Matud pa ni Rama nga gipaabot na lang niya ang approval gikan ni Robredo ug iya usab nga gihangyo ang dinalian nga tubag niini.
Gipahibalo sa mayor nga nag-agi siya og daghang konsultasyon sa wala pa niya mapili si Comar ug iyang nasayran nga pito na kini ka tuig nga nagserbisyo sa NCR ug maayo usab ang track record niini.
Samtang gipadayag ni Rama nga usa sa isugyot niya kang Comar puhon mao ang pagpalig-on og maayo sa puwersa sa fire department partikular na sa dinalian nga pagresponde sa mga dagkong sunog.
Gusto usab sa mayor nga himoon nga presentable ang buhatan sa city fire department ug iya kining palimpiyohan.
Nasayran nga nag-agi si Comar og 107 ka international training sa pagresponde sa bisan unsa nga kalamidad ilabi na sa sunog ug gani nahimo kini nga sakop sa international fire academy.
Sa higayon nga molingkod na si Comar sa city fire department, iyang pulihan ang kasamtangang hepe niini nga si Esmael Codilla. – BANAT NEWS