Laing bata patay sa dengue

CEBU, Philippines - Laing bata na usab ang namatay sa dengue sa dakbayan sa Talisay niadtong Domingo.

Ang bata mao si Ruby Jones Cabañero, 5-anyos taga sitio Tiago, barangay San Isidro, dakbayan sa Talisay.

Ang iyaan ni Ruby Jones nga si Roselle Lariosa, 33, residente usab sa maong dapit nga nahinabi sa mga tigbalita kagahapon mibutyag nga upat ka adlaw si Ruby Jones nga gihilantan ug nagreklamo kini sa sakit sa tiyan hinungdan nga gidala nila kini sa doktor.

Matud ni Lariosa nga sa unang Complete Blood Count (CBC) sa iyang pag-umangkon nasuta nga 270, 000 pa ang platelet niini ug gituohan nga dunay bitok ang bata hinungdan nga gisakitan sa tiyan ug purgahon unta.

Apan pagkasunod-adlaw pagbalik nila og dala sa bata ngadto sa doktor gipaubos kini og laing CBC ug ang platelet niini miubos na ngadto sa 91,000 hinungdan nga niadtong Sabado gi-admit nila kini ngadto sa Miller Hospital apan nianang Domingo namatay si Ruby Jones.

Gibutyag ni Lariosa nga niadtong Agosto 31, 2010 ang maguwang sa biktima nga si Pearl Katleen na-admit sulod sa unom ka adlaw ngadto sa South General Hospital sa lungsod sa Naga ug hinuon naka-survive kini.

Si Ruby Jones maoy ika lima nga biktima sa dengue nga namatay sa dakbayan sa Talisay gikan niadtong buwan sa Enero, 2010 hangtod niining buwana. (BANAT NEWS)