CEBU, Philippines - 90 porcento sa mga karneng gipamaligya sa merkado sa Mandaue giihaw sa ihawan sa Brgy. Labogon dakbayan sa Mandaue nga bag-o lang giablihan pag-usab.
Kini ang gibutyag ni Engr. Jimmy Vasquez, hepe sa Management Team ni Mandaue City Mayor Jonas Cortes atol sa pakighinabi sa mga tigbalita.
Matud pa ni Vasquez human maayo ang ilang water treatment facilities sa maong ihawan sa dakbayan subli na nilang gibuksan ang pagdawat sa mga kahayopan nga ihawon sa maong “slaughter house”.
Ang ihawan sa Brgy. Labogon karon adunay bag-o ug modernong mga kahimanan sa pag-ihaw sa mga kahayopan sukwahi sa milabay’ng mga tuig nga wala maatiman ang mga pasilidad sa maong ihawan.
Gipaniguro ni Vasquez nga limpiyo ang mga karne nga gipamaligya sa merkado publiko sa dakbayan sa Mandaue karong panahuna. (BANATNEWS)