Tulisan nasikop sa polis nga off duty nag-drive

CEBU, Philippines - Usa ka lalaki nga gidudahang tulisan nadakpan sa usa ka polis nga off-duty atol sa ginukdanay kagahapon sa kaadlawon sa dalan R. Padilla ug N. Bacalso Avenue ning siyudad sa Sugbo.

Ang nadakpan ug gitanggong sa Punta Princesa Police Station giila nga si Johnrey Entrera, 26, ulitawo nga taga sitio Almacin sa A. Lopez, barangay Labangon ning siyudad.

Ang nakadakop kang Entrera mao si SPO1 Arnold Cabildo nga sakop sa Regional Mobile Group (RMG) ug nadestino sa Mabolo Police Station.

Si SPO1 Cabildo padulong mouli sakay sa iyang motorsiklo ug pag-abot sa maong lugar hinayhinay siyang nagpadagan sa iyang motorsiklo kay sagad sa maong oras naa gyuy mahitabong pagpanulis sa maong lugar.

Iyang nasigpatan si Entrera nga mikalit og dagan human nakakita kaniya hinungdan iya kining gigukod.

Tungod ba kaha sa kakusog modagan ni Entrera naglisod gyud unta paggukod ang maong polis apan kalit nahagbong ang .38 rebolber nga giloklok sa hawak ni Entrera hinungdan nga nadakpan siya ni SPO1 Cabildo.

Ang rebolber ni Entrera nga adunay lima ka buhing bala gi-turnover ni SPO1 Cabildo sa Punta Princesa Police Station.

Ang kapolisan sa Station 11 nanawagan sa publiko ilabi na kadtong nabiktima sa tulis sa N. Bacalso Avenue ug dalan R. Padilla nga moadto sa presinto aron ilhon si Entrera.

Ang kapolisan nag-andam sa kasong illegal possession of firearms and ammunition batok kang Entrera. (BANATNEWS)