CEBU, Philippines - Nagkawilkawil na ang ulo sa usa ka 27-anyos nga ulitawo nga napalgang patay daplin sa dalan sa Sitio Pangi, barangay Nahus-an, lungsod sa Sogod niadtong Domingo sa alas 4:45 sa hapon.
Gikatahong gigulgol si Virgel Arcilla, 27, lumad nga taga barangay Guba, dakbayan sa Sugbo ug temporaryong nagpuyo sa maong lugar nga nanarbaho sa pagpamomba og mangga.
Samtang pabilin pa nga wala mailhi sa kapolisan ang migulgol kang Arcilla.
Matud ni PO3 Elimar Mendoza sa Sogod Police Station sa dihang nahinabi sa Banat News nga si Arcilla nakit-an sa usa ka Berly Aringay nga nagkulob daplin sa dalan nga nagkadugo na ug wala nay kinabuhi sa dihang nahiagi sa maong lugar hinungdan nga nangayo kini og panabang sa mga silingan.
Ang mga silingan na ang daling mi-report sa kapolisan ug sa gihimong pakisusi nasuta nga gi-abis ang liog ni Arcilla ginamit ang sanggot hinungdan nga nagkawilkawil kini sa liog ug maoy hinungdan sa kamatayon niini. Ang kapolisan naka-recover sa crime scene og sanggot nga maoy gigamit sa suspek, usa ka tsinelas nga kolor green ug sinena nga gituohang iya sa suspek nga naghukas na apan naka-shortpants.
Dugang nahipos nga impormasyon sa kapolisan nasayran nga si Arcilla temporaryong nag-abot sa pinuy-anan sa iyang ig-agaw nga si Emilyn Agwanta sa barangay Mangilang. Nananghid kini nga mobisita sa usa ka Ric Aringay sa maong lugar aron pagsusi sa mga binombahan nga mangga niini.
Pag-abot sa biktima sa pinuy-anan ni Aringay na-atol nga maoy pagpamahuway niini gikan nga nananggi og mais hinungdan nga nanugo ang biktima sa usa ka Dodi Boy Aringay pag-utang og duha ka botelyang bino sa tindahan sa inahan sa kapitan ug pagbalik niini gipun-an og usa ka lapad nga giinom uban sa mga barkada.
Pagkahurot sa ilang giinom nananghid nga mopauli ang biktima hinungdan nga namalik usab pagtiwas og sanggi sa mais sila si Aringay, Dodi Boy, Marcelo Colobong nga usa ka tanod, Elmer Huban, Elbert Huban ug uban pa.
Apan mao na lay ilang nahibaw-an paglabay og usa ka oras nga napalgang patay na si Arcilla.
Pabiling blangko ang kapolisan pagtumbok sa motibo ug sa suspek sanglit ang mga kaila ug kainom niini pulos mihulagway nga maayong tawo ang biktima ug gikahibulong gyud nila kun nganong gipatay kini. (BANATNEWS)