Nasikop sa buy-bust pasakaan og tulo ka kaso

CEBU, Philippines - Tulo ka mga kaso ang ipasaka sa kapolisan sa dakbayan sa Lapu-Lapu batok sa usa ka tawo nga ilang nadakpan ug nasakmitan og shabu, armas ug cocaine sa buy-bust operation nga ilang gihimo sa sitio Humay-Humay, barangay Gun-ob sa maong dakbayan.

Kini ang nasayran sa Banat News sa follow-up nga gihimo kagahapon kinsa kasamtangang nag-andam na sa kaso nga ilang ipasaka batok sa ilang nadakpan nga si Rolly Vilanueva Lumabas, 27-anyos nga taga barangay Lahug, dakbayan sa Sugbo.

Si Senior Superintendent Mariano Natu-el, hepe sa kapolisan sa maong dakbayan miingon si Lumabas usa ka level 2 drug pusher dakbayan sa Lapu-Lapu mohalin kini og shabu nga nagkantidad og P50, 000 sa matag semana.

Base sa Republic Act 9165 kon Comprehensive Dangerous Drugs Act of 2001 ang pusher og shabu nga makahalin sa maong gidaghanon nga shabu sa matag semana walay piyansa nga irekomendar ang korte alang sa temporaryong kagawasan niini.

Sa nasayran nga si kanhi Dangerous Drugs Board Vice Chairman Atty. Clarence Paul Oaminal ang mipadayag sa iyang mga kabalaka nga mahidangat ang cocaine sa Sugbo kun ang mga tinugyanan sa balaod nga naglakip sa kapolisan magpasagad lamang usab sa ilang mga kaakohan.  (BANATNEWS)