6 ka suspek sa pangulata gibuhian

CEBU, Philippines - Unom ka mga akusado sa pakyas nga pagpatay sa usa ka tawo sulod sa diskohan ang gipabuhian sa korte human mapakyas ang reklamante sa pagprobar kun mao gyud ang mga akusado ang mga kriminal.

Ang gipakawalay sala ug gipabuhian mao sila si Rusty Rosaroso, Vincent Rosaroso, Antonio Mulig, Raul Reyes, George Pala ug Yogi Hermoso kinsa maoy gikasuhan og attempted murder sa biktimang si Elijah Jihad Catacutan.

Sumala pa sa desisyon ni Judge Generosa Labra, napakyas ang prosekusyon sa pagpakita og lig-ong ebidensya aron magtumbok sa mga akusado sa maong pasangil.

Si Catacutan atol sa cross examination ni Atty. Salvador Solima miangkong wala siya masayod kun si kinsa ang mikulata niya apan atol sa pagkahitabo nakakita niini ang iyang higalang si Jesus Collamar Jr. kinsa maoy mitug-an kaniya nga ang unom mao ang mga responsable.

Apan napakyas ang prosekusyon sa pagpresentar kang Collamar atol sa paghusay sa maong kaso, butang nga gikahibulong sa korte.

Dili usab makatuo ang korte sa pamahayag ni Catacutan nga nahitabo ang krimen atubangan sa mga polis sanglit sumala pang Labra imposibleng pagkakita sa mga polis wala dakpa ang mga gipasanginlan.

Ang mga akusado mibutyag nga hubog si Catacutan niadtong tungura ug nagmugna og kagubot sulod sa diskohan ug nanghinol sa paa sa usa sa mga babaye.

Giingong ang pagpanghinol niini nakapasuko sa igsuon sa babaye hinungdan nga kini gitabangan og kulata sa mga higala niini. (BANATNEWS)