Helmet Law higpit nang ipatuman

CEBU, Philippines - Gimandoan sa kadagkoan sa kapolisan sa Camp Crame ang tanang police units sa higpit nga pag-implementar sa Akta Republika 10054 (Helmet Law) ug ang pagdili na sa pagpaangkas og batang ubos sa 10-anyos ang pangidaron sa tanang mogamit og motorsiklo.

Si Sr. Supt. Melvin Ramon Buenafe, direktor sa Cebu City Police Office(CCPO) sa pakighinabi sa Banat News nagkanayon nga dili na bag-o kining balaura apan gikinahanglang pahinumduman ang publiko.

Sumala pa ni Buenafe nga nakabantay sila nga daghang motoristang dili magsuot og helmet ug kun duna man dili suoton ug anha lang kini gamiton kun dunay mositar kanila.

Samtang aduna say uban nga paspas mopadagan ug adunay mga sakay nga mga bata, butang nga giisip sa kapolisan sa peligro sa kinabuhi sa bata.

Nunot niini, gimandoan ang tanang police stations ug special units lakip na ang mga beat patrols diha sa kadalanan sa pagsitar gyud sa mga makalapas niini.

Sumala pa sa direktiba gikan sa buhatan sa Directorate for Operations sa PNP, base sa suwat sa usa ka provincial prosecutor sa Cavite, makunsiderar nga kalapasan sa Akta Republika 7610 (Child Protection Law) ang pagpasakay og mga bata sa mga motorsiklo.

Gikatahong kini nagbutang kanila sa peligro ug miingon nga ang PNP kanunay nalang magpadala sa pamahayag sa mga ginikanan nga mao ra kini ang ilang makayang sakyanan apan wala nila makita ang mas dakong nagpaabot nga disgrasya.

“Poverty on the part of the motorcycle owner should not be a reason for lawmen to look the other way around. Parents should not expose their children to such grae risk if they really love them,” matud pa sa suwat ni Cavite Provincial Prosecutor Emmanuel Velasco ngadto kang kanhi PNP director Jesus Verzosa.

Hinuon giangkon ni Buenafe nga duna gyu’y panahon nga mopasensya ang kapolisan.

“Usahay ba mo-bend ta gamay ana kay nakahibalo man ta nga mao ray ma-afford nga transportation,” matud pa ni Buenafe apan mipahimangno nga higpitan na nila kini karon.

Giklaro hinuon ni Buenafe nga ang City Traffic Office Management (CITOM) ug Traffic Group maoy nag-unang unit sa CCPO nga gitahasan niini apan miangkon siyang dili tanang panahon anaa ang CITOM tanang dapit. (BANATNEWS)