Plumber nalumos

CEBU, Philippines - Naglutaw nang napalgan daplin sa baybayon ang usa ka plumber kagahapon sa buntag sa barangay Panadtaran, lungsod sa San Fernando.

Ang patay nilhan nga si Felix Tabada, nag-edad og 60 ngadto sa 70-anyos ug molupyo sa barangay Labangon, siyudad sa Sugbo.

Sa pakighinabi sa Banat News ni PO3 Marjoken Misuari, mibutyag kini nga si Tabada naabot sa maong lugar human namilar sa namatay’ng higala sa barangay Tungo nga kasikbit nga barangay sa Panadtaran. Apan nianang pagka-alas 6 sa buntag mibisita si Tabada sa panimalay sa iyang higala nga si Kapitan Catalino Baysa sa maong barangay aron makigpangaligo og dagat tungod kay ang higala niini nagpuyo man duol sa baybayon.

Samtang nagligoligo si Tabada, dako ang kakurat sa mga tawo nga daw naglutaw na lang kini sa dagat ug wala na maglihok hinungdan nga gidali kini sa pagsusi ug didto nasayran nga wala na kini magginhawa. Gidali pagdala si Tabada sa Carcar District Hospital sa panghinaot nga masalbar apan giingong gideklarar kini nga dead on arrival pag-abot sa maong tambalanan.

Matud pa ni PO3 Misuari nga ila pa karong gisubay kun unsa ang tinuoray’ng hinungdan sa pagkalumos ni Tabada. Gani, ila kining ipaubos sa otopsiya. (BANATNEWS)