Malacañang misalikway sa katahap

CEBU, Philippines - Gisalikway sa Malacañang ang mga pagduda ug alegasyong adunay mahitabong ‘whitewash’ sa opisyal nga report sa Incident Investigation and Review Committee's (IIRC) kabahin sa nahitabong hostage taking niadtong milabay’ng Agosto 23.

Ang pagduda mitumaw human ipahibalo sa Palasyo nga unya na kini ipublikar ini og abot ni Presidente Benigno “Noynoy” Aquino III gikan sa Estados Unidos.

Gipahibalo usab nga hatagan una og kopya sa IIRC report ang kagamhanan sa Hong Kong ug China una pa mapublikar sa Pilipinas ang maong impormasyon.

 Ang 83 ka pahinang report gikatakda untang ipagawas sa publiko karong adlawa apan tungod sa giingong pagpadala una og kopya niini sa China ug Hong Kong isip kortesiya wala na kini mahinayon.

"A decision was made to informally give a copy to the Chinese embassy and then make the announcement about the results of the investigation," sumala pa ni Presidential Communications Development and Strategic Planning Secretary Ricky Carandang sa report sa ABS-CBN News.

Samtang gibutyag usab ni Carandang nga posibleng si Justice Secretary Leila de Lima ug dili na si Aquino maoy mopagawas niini ngadto sa publiko.

Sa nahaunang nanggawas nga report, giingong adunay 12 ka personahe ang hayan pasakaan og kasong administratiba ug kriminal nga naglakip sa usa ka lokal nga opisyal, usa ka tigbalita ug ang uban mga polis.

Niadtong Agosto 23, gi-hostage sa gipalagpot nga polis nga si Rolando Mendoza ang usa ka bus. Atol sa negosasyon nasuko si Mendoza dihang gisikop og apil ang iyang igsuon hinungdan nga gitagsa-tagsa niini pagpusil ang mga turistang taga Hong Kong. Walo kanila ang namatay apan napatay usab si Mendoza. (BANATNEWS)