Konseho nag-agad kang Soc

CEBU, Philippines - Ang Committee on Ethics sa konseho sa dakbayan sa Talisay naghulat sa desisyon ni Mayor Socrates Fernandez batok sa job order employee sa siyudad nga si Benedict Gabasa.

Apan ang komitiba moduso og rekomendasyon sa mga job order nga dawaton sa city hall sa siyudad.

Si Konsehal Celiapo Cabuenas, chairman sa Committee on Ethics nga nahinabi sa Banat News nagkanayon nga irespeto nila ang mayor tungod kay si Gabasa ubos sa quota sa mayor.

Hinuon mosumiter sila og report sa resulta sa ilang imbestigasyon ngadto sa mayor kabahin sa nahitabong insidente.

Kahinumduman nga si Gabasa nagmaneho nga walay lisensiya sa sakyanan sa city hall ug nasikop kini sa mga polis sa Pardo Police Station sa milabay’ng semana.

Matud sa konsehal nga moduso og sugyot ang iyang komitiba kabahin sa mga job order nga dawaton sa city hall og trabaho dili na nila kini lisud-lisuron ug pasumitihon og mga rekisitos tungod kay dako na og gasto. Apan ang mga opisyal o department heads diin nahisakop ang quota maoy manubag kun ang job order mga kawani magpabadlong.

Kinahanglang suhituhon una sa mga opisyal o department head ang mga background sa ilang mga quota una nila kini irekomendar nga makatrabaho sa city hall, matud niini.

Si Cabuenas nagkanayon usab nga mosumiter usab og rekomendasyon ang iyang komitiba alang sa mga sakyanan sa siyudad nga kinahanglan ipundo gyud sa motorpool kun wala gamita ug ang mogamit niini kinahanglang duna gyu’y trip ticket.  (BANATNEWS)