Pito nahilo sa bringhouse

CEBU, Philippines - Pito ka mga tawo lakip ang duha ka bata ang nangalanag sa ilang gikaong ‘bringhouse’ nga kaldereta kagahapon sa buntag ug nangalandig sa Cebu City Medical Center.

Ang mga biktima gikatahong nakasinati og pagkalipong, pagsakit sa ilang tiyan ug pagsuka-suka human makakaon sa kalderetang gidala sa usa ka Gladys Antique gikan sa ilang party sa tunghaan niadtong milabay’ng gabii.

Sa report sa DyAB kagahapon, giila ang mga nalandig sa tambalanan mao sila si Honey Melody Bacus, 5, Arnelia Bacus, 42, Jennifer Edolantes, usa pa ka tuig, Hilda Torres, 36, mga ugangan ni Torres nga sila si Lucia ug Leopoldo Torres ug Jessie Olanes, 23.

Ang mga biktima pulos nagpuyo sa Private Road sa barangay Sambag Uno ning dakbayan.

Sumala pa sa report, gikan mitambong og party sa ilang tunghaan si Antique niadtong milabay’ng gabii ug nagdala og sobra nga sud-ang kaldereta nga gisulod sa kaserola.

Apan kagahapon pa sa buntag gihatud ni Antique ang maong sud-an diha sa balay ni Arnelia Bacus diin ilaha kining gibahin-bahin ug gikaon, sumala pa nga si Torres maoy mihungit sa maong pagkaon sa batang si Edolantes.

Dangtang pila ka minutos ang milabay si Arnelia kalit nga nalipong ug nagsakit ang tiyan ug nagsuka-suka, mao nalay iyang nahibaw-an nga hasta ang mga kauban niyang nakakaon sa maong pagkaon susama gihapon og nasinati.

Kini maoy hinungdan nga nagdali sila pag-adto sa CCMC diin gihatagan dayon sila og tambal.

Usa ka nurse diha sa CCMC nga gitawgan sa Banat News kagahapon mikumpirmar nga aduna pay lima ka pasyenteng pabiling adunay gitaod nga dextrose. Gikatahong na-admit sila alas-onse pasado kagahapon sa buntag. Wala hinuon siya mohatag og detalye kabahin sa kahimtang sa lima.

Nasayran nga si Arnelia arang-arang na ang kahimtang samtang si Olanes nakagawas na dayon human madapati og tambal ug wala na kinahanglana pang i-admit og dugay. (BANATNEWS)