CEBU, Philippines - Nalandig sa tambalanan human makaangkon og samad pinusilan sa iyang sampot ang usa ka call center agent human kini mapusili samtang nag-inom diha sulod sa usa ka convenience store kagahapon sa kadlawon sa sitio Kasambagan, barangay Mabolo ning dakbayan.
Ang biktima mao si Jim Carlos Dadula, 22-anyos, ulitawo, call center agent ug molupyo sa barangay Tabunok, dakbayan sa Talisay.
Ang suspetsado giila lang sa ngalan nga “Yan-Yan” o “Yanix” taga Villa Aurora, sitio Kasambagan.
Giingon nga si Yanix atol sa pagpamusil uban ni Eduardo Otida Talisic, 28, ulitawo, walay trabaho ug molupyo sa sitio Panagdait, Kasambagan, Mabolo ug giingon nga maoy unang miduol ngadto kang Dadula.
Base sa imbistigasyon sa kapolisan nga ang biktima ug usa ka kauban sa trabaho niini nagkasabot nga mag-inom human sa ilang trabaho diha sa nahisgutang convenience store.
Ug samtang nag-inom kalit lang miduol si Talisic dayon nanghuwam og lighter ngadto kang Dadula.
Apan sa walay igong rason gilabayan og basura ni Talisic ang lamesa nga giukopar sa biktima ug kauban niini ug nahitabo ang komprontase tali sa biktima ug ni Talisic.
Taliwala sa komprontase miduol si Yan-Yan ngadto kang Dadula ug gitiunan niini ang biktima og pusil ug gikablit ang gatilyo.
Human sa maong pagpamusil si Yan-Yan daling nakaikyas apan si Talisic nasikop sa mga polis nga miresponde nga sila si PO2 Joel Rosales ug PO2 Mario Agda sa Mabolo Police Station.
Si Dadula daling gidala ngadto sa Perpetual Succor Hospital aron sa pagpatambal sa samad pinusilan sa iyang to-ong bahin sa sampot.
Na-recover sa kapolisan gikan sa lugar nga nahitaboan ang usa ka kabhang ug deformed slug sa 9mm nga pistola. (BANATNEWS)