Mga konsehal mitibi sa pasangil

CEBU, Philippines - Ang mga sakop sa konseho sa dakbayan sa Talisay gibati og kalagot bahin sa isyu nga matud pa adunay nangayo kanila og P1.5 milyones sa developer sa complex subdivision diha sa barangay Maghaway proper.

Si Konsehal Bernard Odilao ug Konsehal Edward Alesna nga nahinabi sa Banat News nagkanayon nga sa milabay’ng duha ka semana gisultihan sila sa mayor sa nadawat niining report nga adunay mga sakop sa konseho nga nangayo og P1.5 milyon sa Cebu Land Master (CLM).

Matud ni Odilao ug Alesna nga nahingangha sila niini hinungdan nga ila usab kining gibutyag ngadto sa uban nilang mga kauban.

Si Konsehal Rodolfo “Rodi” Cabigas, chairman sa Committee on Infrastructure nagkanayon nga miatubang sila sa mayor uban sa developer aron klarohon ang maong report.

Apan giingong usa ka kawani sa city hall ang nangayo sa maong kantidad apan ang nahisgutang opisyal nagdumili sa pagbutyag sa ngalan sa maong kawani.

Matud ni Cabigas nga mopahigayon sila og imbestigasyon kabahin sa maong report nga ilang nadawat.

Niadtong Biyernes sa buntag ang mga sakop sa konseho sa Talisay uban nila ni city engineer Audie Bacasmas ug sa iyang assistant nga si Gamaliel Vicente ug mga sakop sa City Planning and Development Council (CPDC) mibisita sa nahisgutang complex subdivision tungod sa reklamo sa mga molupyo ug mga opisyal sa barangay.

Giingon nga balhinon sa developer ang karsada sa maong dapit ug nabalaka ang kapin 20 ka mga molupyo nga mahugno ang rip-rap nga gihimo sa CLM ug matabonan sila niini kung balhinon ang karsada.

Si Vicente ug Bacasmas mibutyag nga wala pa makasumitir og mga panginahanglan ang nahisgutang developer ngadto sa ilang buhatan aron makita ug matun-an unta nila kini aron makasugyot sila og mga precautionary measure sa maong proyekto nga gitukod.

Niadtong Agosto 24, 2010 ang City Engineering mipadala og notice of violation sa CLM ug ang maong developer misaad nga motuman sa mga panginahanglan niadtong Agosto 27, 2010 apan hangtud karon wala pa kini makatuman sa ilang saad.  (BANATNEWS)