Fixer nga napusilan gisusi

CEBU, Philippines - Padayon karong gisusi sa kapolisan sa dakbayan ang tanang ospital tungod sa taho nga usa ka fixer sa National Bureau of Investigation (NBI-7) gipusil sa usa ka agent kagahapon sa buntag.

Usa ka opisyal sa maong buhatan mihimakak nga dunay gipusil nga fixer sa usa ka ahente sa NBI-7. Lakip na ang mga tawo sa palibot sa NBI-7 nahadlok usab nga motingog.

Ang grupo ni SPO3 Rey Cuyos sa Homicide Section misusi sa tanang tambalanan sa dakbayan ug Metro Cebu human gikatahong usa ka Violito Amazona, 50, giingong fixer sa NBI-7 gipusil sa usa ka ahente sa NBI.

Nasayran sa Banat News nga ang ahente nailhan sa ngalang “Arnel” apan ang assistant regional director sa NBI-7 nga si Lauro Reyes hugtanong mihimakak sa report nga adunay fixer nga gipusil sulod sa buhatan sa NBI-7.

Usa ka saksi miasoy hinuon nga nagbarog-barog lang si Amazona duol sa kapilya gawas sa buhatan sa NBI-7 nga nagkadugo ang tuong batiis samtang nagpaabot og kasakyan, sanglit walay mitabang nga mga tawo sa dapit tungod sa kahadlok nga usa ka agent ang nakapusil sa biktima.

Sa pagsusi sa Banat News, nasayran nga adunay ahente sa NBI-7 nga gihinganlan og Arnel, apan gipugngan una ang apilyedo niini samtang wala pa makuhai og habig. - BANAT NEWS