Hired killer nga mipatay'g 6 sikop

CEBU, Philippines - Ang hired killer kinsa nakapatay na og unom ka tawo ug miangol sa laing duha nasikop na sa mga sakop sa Tourist Police sa dakbayan sa Lapulapu sa milabay’ng gabii.

Siya mao si Junrey Cacha, 30, nga taga sitio Buyong, barangay Maribago, sa maong dakbayan.

Matud pa ni SPO2 Rolito Jumao-as sa homicide section sa kapolisan sa Lapulapu nga ang gipangihaw ni Cacha nagpuyo sa nagkalainlaing lugar sa maong siyudad sa managlahing higayon.

Kasagaran sa gipamusil ni Cacha may atraso sa ilegal nga drugas ug uban pang krimen

Si Cacha kinsa usa ka hired killer maoy miluthang kang William Jasmin, hingkod nga taga sitio Suba Masulog, barangay Basak, dakbayan sa Lapulapu niadtong Septiyembre 16, 2010 apan wala maintimano.

Didto pusila ni Cacha si Jasmin sa balay niini ug gumikan sa paghilak sa anak sa biktima, gitiyan nalang ni Cacha.

 Nasuta sa imbestigasyon nga si Jasmin gipusil ni Cacha kay wala kini makahatag sa shabu nga gibayran nang daan ni Cacha og P27,000.

 Si Jasmin anaa karon sa VSMMC ubos sa kritikal nga kahimtang.

 Human sa maong pagpamusil, misibat dayon si Cacha apan nakapaalarma kini sa kapolisan   ug ang mga sakop sa tourist police maoy daling nakaresponde.

Gipangunahan ang maong team ni Police Chief Insp. Percibal Zorilla ang hepe sa Tourist Police ug mga kaubanan, diin nasakmit niini ang usa ka kalibre .45 nga pistola ug kalibre .38 nga revolver gikan sa mga kamot ni Cacha.

 Dihang giimbistigar, si Cacha miangkon kini sa iyang pagpusil ni Jasmin ug sa laing unom ka mga tawong iyang gipatay sa milabay’ng mga bulan sa dakbayan sa Lapulapu.

 Sa pagsuwat ning balita gipangita pa sa kapolisan ang mga pamilya sa mga gipatay ni Cacha aron awhagon sa pagsang-at og kaso batok kang Cacha. Nagkagulkol na karon sa prisohan si Cacha. – BANAT NEWS