Demolisyon sa Agus, Mactan gihimo

CEBU, Philippines - Walay nahimo ang mga tag-iya ug nagpaabang og puwesto ug building sa Highway sa barangay Agus lahos na ngadto sa barangay Mactan, dakbayan sa Lapulapu human gipatuman sa kagamhanang lokal sa dakbayan sa Lapulapu ang pag-demolish sa mga estraktura kagahapon sa buntag.

Sila si Lapulapu City Administrator Teodulo Ybañez ug Atty. James Abadia sa City Attorney’s Office mipasabot nga dugay na nilang gihatagan og pahibalo ang mga naapektuhang establisamento sa demolisyon kun dili nila mismo gubaon ang ilang mga estraktura nga milapas na sa sukod sa usa ka gilapdon gikan sa highway.

Base sa balaod nga milapas na sa 10-metros gikan sa sentro sa dalan ang maong mga establisamento hinungdan nga huot na ang dalan sa maong dapit ug nakamugna og bagang-duot sa trapiko.

Bisan pa sa tulo ka hugna sa paghatag og notisya ngadto sa 32 ka mga edipisyo ug sa ultimatum niadtong Sityembre 2, 2010, nagmagahi gihapon ang mga tag-iya niini hinungdan sa demolisyon kagahapon.  – BANAT NEWS