CEBU, Philippines - Usa ka biyuda nagpakitabang human gipahimuslan sa usa ka lalaki niadtong miaging kaadlawon sa Bogo Central School sa lungsod sa Bogo.
Ang biktima nagpangidaron og 38-anyos ug usa ka biyuda nga molupyo sa barangay Dakit, sa maong lungsod.
Samtang ang suspetsado giila sa biyuda nga mao si Genuel Ylanan Castillote, 20, ug molupyo sa sitio Antonio, barangay Binabag, Bogo.
Sa pakighinabi sa Banat News ni PO2 Flores Velasquez sa Bogo Police Station mibutyag nga samtang nagbaklay ang biktima sa nahisgutang lugar iyang nabantayan nga adunay nagsunod kaniya.
Apan wala lang damha nga kalit lang siya gibunlot sa suspetsado ug gipugos og pasulod pinaagi sa pagtukmod paingon sa suok nga bahin sa tunghaan ug didto gisugdan og pahimulos.
Human nakuha sa suspek ang pagkababaye sa biktima, dali kining misibat, samtang ang biktima nangayo og pakitabang sa kapolisan.
Sa hot pursuit operation, nasikop ang suspek sa ilang panimalay ug positibo kining giila sa biktima.
Matud pa ni Velasquez nga base sa gibutyag sa biktima nga gihulga kini sa suspetsado ug gigamitan og kusog aron dili makatingog hinungdan nga nakuha gyud ang pagkababaye niini.
Midugang si Velasquez nga ang suspek midepensa ug nagkanayon nga hubog siya niadtong tungora ug wala siya masayod sa iyang gibuhat.
Sa pagkakaron kasamtangang nagtingkagol ang suspetsado human kini gipasakaan og kasong pagpanglugos. – BANAT NEWS