100 ka vendors namiligro

CEBU, Philippines - Delikado na alang sa mga vendors sa Mandaue public market ang edipisyo sa maong merkado nga mahugno gumikan sa kadaghang depekto nga nakita sa Mandaue City Engineers Office.

Base sa inspection report sa officer-in-charge (OIC) sa Mandaue City Engineering nga si Gregorio Omo pinaagi ni Engr. Winefreda Dedel nasuta nga ang edipisyo sa karaang merkado sa dakbayan sa Mandaue adunay mga dagkong liki sa mga beams ug slabs sa ikaduhang andana.

 Sa maong report gibasehan ang dili maayong pagkaayo ang merkado human kini masunog sa milabay’ng katuigan.

 Nakita usab sa maong inspection nga ang ibabaw’ng bahin sa edipisyo adunay nagpundong tubig ug mga basura ug mitulo na kini ug gani adunay mga gagmay’ng tipaka sa semento ang matagak padung ngadto sa mga stalls sa mga vendors nga nahimutang sa ubos nga bahin sa maong merkado.

 Gumikan niini girekomendar ni Engr. Omo ang dinaliang pagpapahawa sa mga vendors sa maong merkado aron dili kini mabiktima sa disgrasya nga mugna sa kahuyang na sa estraktura.

 Ang hepe sa Project Management Team ni Mayor Jonas Cortes nga si Engr. Jimmy Velasquez nagkanayon nga bugtong tinguha sa lokal nga kagamhanan sa Mandaue mao ang seguridad sa mga vendors ug mga konsomidor sulod sa maong merkado publiko.

 Si Cesar Mercadal ang Market Administrator sa dakbayan sa Mandaue mipadayag nga ilaha unang butangan og relocation site ang mga vendors duol sa karaang merkado gumikan kay dili pa mahimong ibalhin ang mga vendors sa bag-ong merkado luyo sa Mandaue City Sports complex gumikan sa kakulangan sa panubig ug ang access road gikan sa Mandaue Reclamation area ngadto na sa merkado.

 Ang mga vendors nga nahinabi sa Banat News supak nga pabalhinon sila ngadto sa bag-ong merkado tungod sa ilang nakita nga mga problema usa na niini kalapad sa dalan nga tabokon paingon ngadto sa merkado.

  Ang mga vendors miawhag sa siyudad nga dili una sila ibalhin ngadto sa bag-ong merkado sa umaabot nga bulan sa Nobiyembre ning tuiga. - BANAT NEWS