Rama: Suportahi ang clean-up program

CEBU, Philippines - Si Mayor Michael Rama kagahapon nanawagan sa publiko pagsuporta sa ika-20 nga Coastal ug ika-16 nga Urban Clean-up nga nagtangag sa tema nga “Ang Palibot Limpyohan Paglikay sa Katalagman” karong Septiyembre 18.

“Magtinabangay ta nga manglimpiyo sa atong sapa. Busa niining higayona, kinahanglan nato ang bayanihan, barangayan ug boluntarismo,” matud pa sa mayor.

Ang kalihukan usa ka programa sa Cebu Coastline Management Board nga nakig-alayon sa City River Management Council nga ang mayor maoy chairman, Konsehal Eduardo Rama ang vice-chairman, ug mga kapitan sa siyudad mga miyembro.

Matud ni Konsehal Rama nga angay hatagan og pagtagad ang mga barangay sa siyudad ilabi na kadtong mga duol sa mga sapa gumikan sa kapeligro panahon sa ting-ulan.

Gisaulog ning bulana ang National Clean Up Month busa hingusgan sa siyudad ang programa nga “Adopt a River, Adopt a Barangay.”  - BANAT NEWS