Minoriya sa Talisay mopasar resolusyon

CEBU, Philippines - Mga konsehal nga ubos sa minority bloc sa konseho sa dakbayan sa Talisay gikatakdang mopasar og ordinansa sa pagpahigpit og gamit sa mga butang nga iya sa siyudad.

Kini dunay kalambigitan sa ulahing hitabo dihang si Benedict Gabasa, job order sa city hall mimaneho nga walay lisensiya sa Toyota Revo nga nagtangag sa plakang SHG-541 sa milabay’ng adlaw ug nasikop sa kapolisan sa Pardo.

Si Konsehal Romeo Villarante sa pakighinabi sa Banat News mibutyag nga sila si Konsehal Danny Caballero gikatakdang moduso og ordinansa pag-istrikto og paggamit sa butang sa siyudad aron walay makapangabuso.

Gawas niini, si Villarante nagkanayon usab nga sila ni Caballero mopahigayon og kaugalingong imbestigasyon kabahin kang Gabasa ug sa mga nanobra nga job order sa city hall.

Gibutyag ni Villarante nga base sa report nga iyang nadawat ang Talisay City Hall dunay sobra sa 900 ka mga job order.

Ang ubang mga opisyal sa siyudad dunay quota nga sobra sa 20 ka mga job order apan sila ni Caballero duha lang ang ilang quota. Lakip si Konsehal Val Ylanan kinsa sakop sa administrasyon duha lang usab ka job order.

Si Bise Mayor Alan Bucao nga nahinabi sa Banat News kagahapon nagkanayon nga gilauman niya nga karong adlawa mosumiter na sa ilang report ang mga sakop sa Commitee on Ethics kabahin sa kaso ni Gabasa aron matuki kini sa umaabot nilang sesyon karong Martes.  - BANAT NEWS