CEBU, Philippines - Namatay ang usa ka lalaking hubog sa dihang mitabok sa sapa paingon sa iyang balay sa barangay Montealegre, lungsod sa Tuburan, niadtong Miyerkules sa alas 8:30 sa buntag.
Ang biktima mao si Renato Mangas Montebon, 42, ug molupyo sa maong lugar.
Matud ni PO3 Antonio Albite sa Tuburan Police Station sa dihang nahinabi sa Banat News nga hubog kaayo si Montebon nga mipugos paglabang sa sapa hinungdan nga wala makasugakod sa bul-og sa tubig hinungdan sa pagka-anod.
Usa ka molupyo sa maong lugar nga si Antonio Labangon miduaw sa iyang piggery sa maong lugar ug maoy nakakita ni Montebon nga naglutaw nalang nga wala nay panimuot.
Gi-report niya kini kang Kapitan Lodevico Roquero hinungdan nga naugkat ang biktima. - BANAT NEWS