Derilo gitionan sa lalaki

CEBU, Philippines - Opisyal sa Firearms, Explosives, Security Agencies and Guards Supervision Section (FESAGSS) gitionan og armas sa usa ka lalaki atol sa konprontasyon niadtong Martes sa gabii atubangan sa usa ka spa sa barangay Kasambagan, ning dakbayan sa Sugbo.

Si Supt. Rex Derilo mipatanggong sa detention cell sa Cebu City Police Office sa nanion niya nga si Jose Maria Ylaya alyas Bombie, 48, taga dalan A.S. Fortuna, barangay Banilad, dakbayan sa Mandaue human nadakpan sa follow-up operation sa mga sakop sa Investigation and Detective Management Branch (IDMB) sa CCPO.

Si Derilo misaysay nga niadtong Martes sa alas 6:35 sa gabii nagpaabot siya sa iyang drayber gikan nagpamasahe sa Holiday spa sa dihang mihunong ang kolor blue nga Toyota Sedan (XBL-225) ni Ylaya sa luyo sa iyang sakyanan ug nagsige’g busina.

Wala makapaabante ang iyang drayber tungod sa duha ka taxi sa atubangan, apan nagsige gihapon og bosina si Ylaya.

Giduol ni Derilo si Ylaya ug giingnan “part ayaw pag-apura, huwat lang kadiyot kay dili makalusot ako drayber kay may taxi!”

Apan si Ylaya mikanaog ug misinggit “isog man kaayo part.” Gitubag ni Derilo kini, “taasan lang tika og tingog kay di man ka kahuwat, kita ka nga dunay duha ka taxi sa unahan mao nga dili makaagi ako drayber.”

Misulod sa sakyanan si Ylaya ug mikuha og armas, dayon mibalik og kanaog dayon tion kang Derilo ug giingnan si Ylaya nga “part wa lay pusilay” ug niining higayona mibalik si Ylaya sa iyang sakyanan dayon ingon “Abi nako isog ka.”

Matud ni Derilo nga gibalikan pa gyud siya ni Ylaya dayon ingon niining “unsa man imo gusto part?” Gitubag niya kini “kalma lang part kay gamay ra kaayo ni, padakoon pa gyud nimo, ato lang ni estoryahon!” dayon nagpaila siya nga si Rex Derilo ug mipaila usab sa iyang kaugalingon si Ylaya nga siya si Bombie Ylaya.

Matud ni Derilo nga nakakita siya’g duha ka klaseng armas ug mga magasin sulod sa sakyanan ni Ylaya nga mipasutoy paingon sa Talamban.

Gisundan unta kini ni Derilo apan nasangit siya sa trapiko ug mibalik sa Holiday spa ug nanawag sa Mobile Patrol Group aron mapa-alarma.

Nasuta ni Derilo sa usa ka guwardiya nga si Shernov Surban nga usa diay ka regular costumer si Ylaya sa PRT sa Holiday spa.

Pagkasunod gabii, pasado ala 7:30, si Ylaya gihup-an sa mga operatiba sa IDMB sa maong spa. Kuyog niini si Derilo ug Insp. Delfin Bontuyan.

Pipila ka gutlo migawas si Ylaya. Si Ylaya nasuko nga gitutokan hinungdan nga iyang gisita si Bontuyan.

Si Ylaya mideretso sa iyang sakyanan ug mikuha sa iyang .380 caliber pistol ug didto nagpaila na sila si Bontuyan nga mga polis ug gilayog si Ylaya kinsa milugnot apan napugngan ug napusasan.

Nakuhang mga ebidensya sulod sa sakyanan ni Ylaya mao ang usa ka cal. 380 Bersa, duha ka magasin sa cal. 380 pistol, 29 ka buhing mga bala, usa ka Bersa pistol key, usa ka black ammunition case, usa ka black belt ug shoulder bag.

Si Ylaya sa dihang gidala sa buhatan sa IDMB nangayo’g pasaylo kang Derilo apan wala kini pasayloa sa naulahi.

Matud ni Chief Insp. George Ylanan, hepe sa IDMB nga ilang pasakaan og kasong illegal possession of firearms and ammunitions si Ylaya.

Si Ylaya sa dihang gikuhaan og reaksyon sa mga tigbalita nagdumili kini pagtingog. - BANAT NEWS