Joavan susihon pusher ba gyud

CEBU, Philippines - Gipalapdan na sa Regional Intelligence Division (RID) Regional Headquarters ang imbestigasyon sa pasangil nga ang sinagop ni Mayor Socrates Fernandez sa dakbayan sa Talisay nga si Joavan Fernandez nalambigit sa pagpayuhot og ginadiling drugas.

Si Sr. Supt. Patrocinio Comendador, hepe sa RID nagkanayon nga seryoso ug bug-at ang alegasyon sa babaye nga bodyguard ni Joavan nga nagpa-blotter sa Pardo Police station nga mitug-an nga si Joavan usa ka drug pusher ug ang tigsuplay og shabu niini ahente sa Philippine Drug Enforcement Agency.

Matud ni Comendador nga posible ang pasangil sa babaye batok kang Joavan.

Gibutyag ni Comendador nga duna siyay ngalan sa PDEA agent nga giingong supplier ug protektor ni Joavan, apan nagdumili siya pagtug-an sa ngalan niini sanglit ila pa kining himoan og makuting pakisusi sa alegasyon.

Apan giklaro niini nga dili pa gyud angay ipublikar ang ngalan sanglit dili pa kaayo “hinog” hinungdan ila pa kining gitan-aw og maayo ang value sa report nga ilang nadawat.

Ang regional director sa PDEA-7 nga si Adrian Alvarino mihagit sa babaye nga hinganlan ang PDEA agent.

Nagtuo hinuon si Alvarino nga diversionary tactic kining gihimo sa babaye nga nagpa-blotter sa Pardo Police Station tungod kay misumbong lamang kini human ma-alarma og balik si Joavan.

Apan bisan pa niini, miingon si Alvarino nga mohimo gihapon sila’g kaugalingong imbestigasyon.

Siya mipasabot nga dili mahimong ang mga shabu nga ilang masakmit sa mga operasyon ilang kuhaan ug ipabaligya og balik sa mga drug pusher sanglit ila man kining ideretso ngadto sa Crime Laboratory.

Si Mayor Fernandez sa dihang nahinabi sa ABS-CBN kagahapon mihimakak nga si Joavan nagbaligyaan og shabu. – BANAT NEWS